انا مطلقه وعندى ثلاث بنات بقالى ٨ سنين وهو سافر بعد الطلاق مباشره وقعد اول اربع سنين مكنش بيبعت فلوس وبعدين بدا يبعت بس مش اللى بيكفيهم وكان يقول ده إلى يقدر عليه واهلى متحملين باقى المصاريف من سنه بنتى عملت عمليه فى العمود الفقرى اتكلفت ١٥٠ الف جينه استلفت منهم ٧٠ واخويا وامى دفعو ٨٠ وهو مدفعش كان بيقول معييش معييش ومش إمكانياتى اقوله قول لوالدك يقولى ولا انا معايا ولا أهلى معاهم حاجه هو فعلا يمكن اهله معهموش بس اهلى اللى يشيلو الطين ده عادى محدش بيسأل فى البنات ولا عليهم خالص من ساعه الانفصال غير عمتهم بس اللى بتودهم وتجيلهم الفتره دى كنت منهاره وكل ما اروح لدكتور يصعبها عليه اكتر اربع دكاتره واحد منهم قالى العمليه هتكلف ٣٥٠ الف ونسبة النجاح مش هتتعدى ال ٨٠ فى الميه يعنى لقدر الله البنت تموت او تتشل وروحت لمركز القوات المسلحه قالولى مش اقل من ٢٠٠ الف مبدئيا والحاله متاخره جدا والدكتور حتى ساعتها كاتبلى الاشعات والتحاليل اللى اعملها علشان تدخل عمليات بسرعه كل ده يقولى معييش واهلى معهمش انا انهارت الصراحه وشتمت كتير وعملتله بلوك من عندى ومن عند البنات قولت يمكن يحن ويدور عليهم قعد اربع شهور ولا يسأل ولا يتكلم ولا ظاهر اصلا لحد ولا حتى بيبعت فلوس الشهر اصلا لدرجة انى قولت اكيد جراله حاجه وبعدين خليت البنت الكبيره تبعتله بمجرد ما بعتتله رد عليها عادى جدا ولا كأن فى حاجه يعنى عايش عادى حضرته ومكبر دماغه وطبعا بعد كل ده ركبنا الغلط لمجرد انى انهارت وشتمت اما كان بيقولى معهوش حتى لو نعتبره غلط منى ده رد فعل مش فعل اكييد عامل كده زى اللى خبط الكوره فى الحيطه وزعل انها اترزعت فى وشه و انا فى كذا حد طلب يتجوزنى بس المشكله ان انا بجد الجواز بالنسبه لى علشانهم قبل ما يكون علشانى يعنى علشان اضمنلهم الاستقرار والجو الأسرى اللى اتحرمو منه لازم اضمن ان اللى هتجوزه هيصون البنات ويحافظ عليهم قبل ما يصونى انا وبجد مبقاش فى رجاله مضمونه فى الزمن ده الا من رحم ربي
هو نزل من شهر تقريبا واتجوز وعمل فرح كبير وجاب شبكه وشقه بيقول وبيدعى انها شقة العروسه بس هو على الاقل اكيد وضبها يعنى ان مكنش برضه اكيد جايبها معاه جايبها لوحده الله اعلم بس هى مش كل دى فلوس وإمكانيات ولا انا مفتريه ولا ايه المهم
اخويا بعتله وقاله ان انا سالفه فلوس من تمن العمليه قاله ابعت فلوس تسد اللى عليها قاله محدش ليه فيه انا حر ومقولتلهاش تدفع هى بتدفع لبنتها انا كنت هستني علاج على نفقة الدوله والبنت حالتها كانت صعبه جدا بشهاده كل الدكاتره مكنتش تستحمل الانتظار نزل مره واحده من بعد السفر بسنه تقريبا سنه ونص وبقاله ٦ سنين او ٧ منزلش ولا شاف بناته وبرغم كده من ساعة ما جه من شهر حتى مشفهمش غير مرتين المرتين ميتعدوش الساعتين ومره كمان نص ساعه كده ساعة عيد ميلاد البنت الصغيره محاولش يعوضهم الوقت اللى عدى ده وهو مش معاهم عريس بقى يا جماعه نعذره ولا ايه
وهو من النوعيه اللى مبيطلعش نفسه غلطان خااالص يعنى مثلا لمجرد انه بدأ يبعت مصاريف كل شهر تكفى متكفيش بقى مالوش فيه هو بيبعت وخلاص واما ساعات بيحتاجو هدوم بيبعت يعنى لمجرد انه بيعمل كده شايف نفسه عداها العيب وازح كمان يعنى معاهم وانه عامل اللى عليه وزياده يعنى لكن اهتمامه المعنوي حتى بيهم بغض النظر عن مصاريف العمليه اهتمامه المعنوي بيهم بس مش موجود هو عادى اب بقاله ٦ او ٧ سنين مشفش عياله والصغيره تقريبا متعرفوش اصلا يجى بعد كل ده وميحاولوش حتى يعوضهم ويبقى معاهم باستمرار واهله كمان محدش عارف يكلم معاها ولا ياخد حق ولا باطل معاها وهما يمكن مش فى ايديهم حاجه او مش راضين بس ساكتين وسيبينه ومبيكلموش مش عارفين يعنى ياخدوا معاه موقف حق انا مش عارفه ابطل تفكير يمكن المشكله تبان هايفه للبعض بس هما البنات فعلا محسوش بشعور الاب خالص صعبانين عليه اوى انا حتى لو فى الشارع حتى لو لوحدى من غيرهم وشفت اب مع عياله ماشي عادى فى الشارع بتعب وبزعل عليهم و علشانهم وببقى والله عايزه اروح اضرب تعظيم سلام للاب ده وهو بعد كل ده جه ومحاولش يعوضهم اى حاجه بعد فترة الغياب دى كلها ده غير انه كان واخد فلوس من والدتى بحجج كتير وطبعا دول من ساعة ما كنا متجوزين ودول راحو ولا فى الحسبان اصلا اسفه جدا للإطاله بس والله فى تفاصيل وحاجات تانيه اتغضيت عنها ومحكتهاش, Society Problems
مارس 29, 2023
-
النهارده بس
مشكلات زوجية
- كتبو Society Problems
